"mar ferido", praia de Lagos (Beluso), óleo Milucho |
Non dou feito, non dou
chegado
Non
dou feito con tanto acontecemento vivido nestes derradeiros días. Eu coidaba
que iamos ter unha tregua despois de tanta enchente (agás das larpeiradas do
Nadal) de noticias por mor das eleccións
xerais do pasado día 20 de novembro e o
“modélico traspaso de poderes”, según decían uns e outros que estaba a suceder.
Pero todo foi un feitizo seica. Esvaecido o fume da cachimba da paz, voltamos
de novo ás mesmas lideiras, rifas e liortas político económicas con que nos
deitamos no 2011. Non hai maneira. Semella que nos queren ter sempre
desacougados e non nos deixan un chisco de repouso para coller bafo. Non dou
chegado o día que os “mercados” nos dean algunhas novas que non sexan as de
apertarnos ainda máis e máis o cinto,
mesmo semella que queren que teñamos unha figura de escándalo. Poderían ser
máis imaxinativos e procurarnos baixa-los impostos e ternos unha vida máis doada.Pero non. Seguen
a xogar con nós ao despiste e poñendo, uns e outros, ventiladores ás miserias
máis insondables. O goberno actual e a oposición andan rifando coma xa o
fixeron non hai moito a oposición e o goberno
anterior. Uns decindo que o déficit era o 6%, e os outros, que non, que
foi finalmente o 8%; uns , que a fórmula para sair da recesión e baixa-los
impostos e fomentar o gasto público, e os outros que hai que subilos e axustar
as contas públicas e deixarse de tanta carallada. Uns, que por aquela fenda mirábase
o día( expresión esta moi utilizada no sector da construcción, como explicoume
moi ben o meu amigo Carballo), e os outros que non, que a fenda estaba ben
tapadiña agás dunha pequena raia sen importancia; e polo medio, donde hai patrón non manda mariñeiro; se non
queredes caldo……xa sabedes a fórmula simple e sen crebar demasiado os miolos, hai
que subir os impostos: IRPF, IBI, as taxas; e de postre tamén os servizos
básicos: o gas, transporte, etc. E iso que o Goberno actual xa o dixo ben
clariño:”este é o primeiro paquete de medidas”. Logo quere decir que virán
outras piores. Tamén este ano promete no eido dos xuizos, os de verdade e os
paralelos ou tamén chamados mediáticos: “o dos traxes, o caso Urdangarín e os
seus derivados, Pepiño Blanco, etc, etc”. Por esta banda temos festa rachada
garantida. Estaremos moi atentos. Non dou feito, e tamén non dou chegado o día
para ver tanto acontecemento neste novo ano 2012 que xa bota a andar. Pax vobiscum.