Outono nas praias, area de Bon e Lagos

Á procura do mar
en Covelo, unha emoción

enxalza o meu espírito
cando vexo as leiras
reverdecidas pola choiva
fresca, escoito os regatos cantareiros
que me levan cara á praia
de area de Bon,

A pouca distancia,
acubillada por piñeiros,
outra praia, de area grosa,
rochas e penedos de granito

durmidos  nun relanzo
de auga salitrosa
emerxe a praia de Lagos
harmoniosa.

Outono dos Pazos

Entre bidueiros e umeiros espidos

unha fraga enmeigada

fronte ó pazo de Ouril,

febril luz de outono

esvaída, 
guíame cara ó pazo
de Santa Cruz, i eu

dende aí, afiuzada

a súa beleza,

contemplo, con grandeza

a fermosa enseada

de Bueu,

Outono en Cela e Praia de Beluso (Bueu)

O feble sol de Decembro
alumea, oblicuo, a cancela
da miña horta e amorna,
vagaroso, as avermelladas
videiras de Cela...                           

Berce do viño Tinto Femia...,

e esvarando polas súas ladeiras
atopámonos, con gran amor,
coas praias e dunas de branca area,

Agrelo e Portomaior...., 

 Cara ó Sur, esgotada  polo uso
das longas mareas, 
do verán,      

déitase a miña dorna
na praia de Beluso
ó abeiro da nortada.