(Amnesia)
Achego o
carolino de tinto femia
aos meus
beizos fendidos
e unha pinga
trémula esvara
polo queixelo
ata caer
na páxina
dun xornal, enchoupando
a sección de
sucesos;
“Un ferido por arma branca
desángrase ata morrer
ao carón dunhas nasas
amoreadas preto da rampla
do peirao; no peto esquerdo
da súa chaqueta…”
Tento limpar
cun pano de mesa
o recadro da
nova lutuosa
pero non son
quen de adiviñar,
a mancha
tinxida de viño
esborrancha as
palabras;
boto o
derradeiro grolo,
meto a man
na billeteira,
e no reverso
dun billete
de vinte
euros advirto a miña
propia letra
ensanguentada.
No hay comentarios:
Publicar un comentario