 |
| "burato do inferno", illa de Ons |
O PERCEBE E A FLEXISEGURIDADE
Ollei o Faro de Vigo o pasado
sábado día 18 de febreiro, como adoito facelo, dende “cartas ao Director” e recuando atá chegar á portada (unha teima coma outra
calqueira), e fixeime nunha nova que me deixou gratamente abraiado. Seica unhas
mulleres de Oia e A Garda veñen de pór
en marcha un proxecto chamado “A Percebería”, que ven sendo unha cooperativa
que, disque, sen intermediarios e a un prezo xusto, van vender por internet o noso crustáceo máis saboroso,
o PERCEBE, ou se queredes chamalo tamén polo seu nome centífico “pollicipes cornucopiae”(Leach, 1824).
Mesmo van facer visitas guiadas para que os ponteciais clientes teñamos de
primeira man o coñecemento e comprobemos “in situ” de qué xeito adoitan extraer
o devandito marisco das rochas batidas polo mar ferido. O segundo titular non
pode ser máis siñificativo:”Queremos dar un pulo a este proxecto…..e sair do
burato”, disque.
Estas afoutadas empresarias, coido
que xa coñecen a Reforma Laboral, porque son o prototipo de mulleres FLEXISEGURAS
i EMPRENDEDORAS, e co tempo, mesmamente poden acadar as súas propias
franquicias e ser merecedoras das axudas que contempla a norma recén estreada.
As galegas, e os galegos tamén, somos así. Con ese minifundismo autárquico que
nos caracteriza, somos quen de pretender, ao mesmo tempo, a flexibilidade e a
seguranza necesarias para acadar as nosas ilusións. Queremos ter algo seguro na
nosa vida e a independenza imprescindible para non vernos sometidos ás
rixidezes e ás ordes dunha empresa tradicional con esas eventuais modificacións
substanciais das condicións de traballo, mobilidade xeográfica, ERES, despidos
obxetivos, descolgues nos convenios colectivos, e outras caralladas
semellantes. Meus parabéns para estas mulleres emprendedoras e que saiban que
contan con todo o meu apoio. O de sair do burato, de momento, non albisco unha solución a corto plazo, porque
xa sabemos que hai marusía no mar e, nin os teimudos “mercados” nin os políticos
vannos a poñer as cousas doadas. Ao millor, imos ter que mergullarnos todos
dentro do “burato do inferno”, como xa o fixeron non hai moito aqueles valentes
percebeiros da illa de Ons. Pax Vobiscum.
No hay comentarios:
Publicar un comentario